إزاي نعمل قص للأعمدة
لما بيكون عندنا عمود في الدور الأرضي العمود ده شايل الأدوار كلها بس كل لما بطلع فوق عدد الأدوار بيقل فبالتالي الحمل علي العمود بيقل فممكن و أنا طالع في الأدوار اللي فوق أقلل قطاع و تسليح العمود.
بيقولك لما تقص العمود بقي و إنت طالع حاول تقص علي الهادي يعنى ميبقاش العمود 30*100 في الدور الأرضي تيجي في الدور الأول تخليه 30*60 لأ كدة هيحصل عندك Eccentricity هتولد مومنت إضافي علي العمود
علشان كدة كل يفضل تقص كل دورين 10 سم من الطول أو كل دورين 5 سم من العرض
مثال :
في الأرضي و الأول = 35*100
في الثاني و الثالث = 35*90
في الرابع و الخامس = 30*90
أه مفيش حاجة إسمها مع كل قصة للعمود هنشيل سيخين حديد لأ مش شرط إنت هتحسب نسبة الحديد الجديدة في القطاع الجديد وارد جدا الحديد يقل معاك بمقدار 2 سيخ ووارد يطلع معاك نفس العدد بس تغير القطر
ووارد جدا يطلع معاك العدد و القطر هو هو
زي لو حسبت حديد قطاع 30*80 هيطلع 11.9 فاي 16 هناخدها 12 فاي 16
لو قصيت القطاع و كان 30*70 و حسبت الحديد هيطلع 10.4 فاي 16 هناخدها برضه 12 فاي 16
(ملحوظة تم حساب الحديد علي نسبة تسليح 1%)
فدلوقتي إحنا عندنا مشكلة قطاع العمود اللي فوق أقل من قطاع العمود اللي تحت بس الأسياخ كعدد و كقطر هي هي
ساعتها بقي هيبقي ليها التفصيلتين اللي تحت في الصورة دول
لو فوق العمود كمرة سمكها 60 سم مثلا و إحنا قصينا العمود 10 سم فهنا تقدر تكسح السيخ عادي طالما الميل أقل من 1:6
أما لو فوق العمود بلاطة مثلا سمكها 20 سم و إحنا قصينا العمود 10 سم فهنا مش هنقدر نكسيح السيخ علشان الميل هنا 1:2 أكبر من 1:6 ساعتها هنتني السيخ و ندخله جوة العمود مسافة Ld و هنجيب سيخ جديد ندخله جوة العمود Ld و يطلع بإشارة للعمود اللي فوق