بالتفصيل حديد تسليح الأعمدة

✅ تعالي أقولك علي كل المعلومات الخاصة بتسليح الأعمدة

التسليح عندنا في الأعمدة مقسم إلي نوعين من التسليح الأسياخ الرأسية و هو (الحديد الرئيسي) و التسليح العرضي (اللي هو الكانات)

تعالي نتكلم في الأول علي تسليح العمود في الـ Cross Section :

1- أقل قطر مستخدم في تسليح الأسياخ الرأسية هو فاي 12 بس المشهور بيبدأ من فاي 16 مم

2- المسافات بين الأسياخ لا تقل عن 7 سم حتي لا يحدث تعشيش و لا تزيد عن 25 سم حتي لا تحدث شروخ ناتجة عن الإنكماش

3- بالنسبة للكانات المسافات بين أفرع الكانات لاتزيد عن 30 سم – بمعني أخر لو المسافات بين الأسياخ الرأسية أقل من 15 سم هنربط سيخ و نسيب سيخ و لو أكبر من 15 سم هنربط كل الأسياخ بكانات

4- طبعاً الأسياخ الرأسية في قطاع العمود توزيعها بيكون متماثل و عددها بيكون زوجي و المسافات بين الأسياخ بتكون متساوية و أقل عدد من الأسياخ بيكون 4 في القطاع المستطيل أو المربع و بيكون 6 في القطاع الدائري

ــــــــــــــــــــــــــــــــــــــــــــــــــــــــــــــــ

✅ تعالي نكمل كلامنا بس هيكون الكلام علي تسليح العمود في الـ Elevation :

5- مبدأياً كدة قبل لما تصب القواعد بتطلع للعمود أشاير من القواعد بيكون طولها 2*Ld واحدة مدفونة جوة القواعد و الطول التاني أشارة للعمود بطول Ld و تعالي نقول إن الـ Ld اللي هو طول التماسك هنعتبره مجازاً 60 فاي مع إن الموضوع مش كدة و طول التماسك ليه معادلة لو عاوز مزيد من المعلومات عن الموضوع ده هتلاقيني عامل فيديو بيتكلم بالتفصيل عن كيفية حساب طول التماسك هسيبهولكوا تحت

6- و بالتالي أول سيخ رأسي عندنا بتاع العمود نفسه هيكون إرتفاعه من وش القاعدة لحد ظهر السقف اللي فوقه + Ld للدور اللي بعده …. تعالي نطلع الدور التاني هتلاقي إن السيخ الرأسي برده طوله من ظهر السقف لظهر السقف اللي بعده + Ld …. وهكذا لحد لما نوصل لأخر دور

7- أخر دور بقي بيكون طول السيخ من ظهر السقف لحد أخر السقف و مفيش Ld علشان محولش الـ Concection بين العمود و الكمرة في أخر دور إلي Fixed Concetion بس مش بنسيب السيخ عدل كدة لأ بتنيه داخل العمود مسافة الجنش الـ Min الموجودة بكود التفاصيل الإنشائية بقيمة 12 فاي يعني لو حسبتها علي فاي 16 هتلاقيها 19 سم تقريباً إنت إتني السيخ بقيمة 25 سم مثلاً

8- بالنسبة لموضوع تكثيف الكانات الكود قالك و الله لو هتشغل الكمرة مع العمود كـ Frame علشان يقاوم الزلازل يبقي هتحتاج تكثف الكانات زي اللي في الصورة اللي تحت و لكن جرت العادة إننا بنكثف كانات الأعمدة في الغالب علي طول حتي لو عندنا Shear walls في المبني أو حتي لو كان المنشأ فيلا مثلا فإرتفاعها قليل

9- طيب نكثف الكانات منين و علي مسافة كام ؟
نكثف الكانات من أعلي البلاطة أو الكمرة و من أسفل البلاطة و الكمرة مسافاة Lo و طبعا منطقة إلتقاء الكمرة و العمود أو البلاطة و العمود كانات العمود فيها بتستمر
مسافة Lo دي هتكون الأكبر من 3 أرقام :
أ- سدس الإرتفاع الصافي للعمود
ب- طول العمود الأكبر (في القطاع)
ج- أو 50 سم
– كمثال لو عندنا إرتفاع الدور 3 متر و السقف فلات بسمك 25 سم هيكون الإرتفاع الصافي 2.75 متر سدسه هيكون حوالي 46 سم – و عندك العمود كمثال أبعاد 30*70 الطول الأكبر هو 70 سم – أو 50 سم
هنلاقي إن مسافة التكثيف هي الأكبر من الثلاث قيم فبالتالي هتكون 70 سم

10 – كمان محتاجين نعرف المسافة بين الكانات في منطقة التكثيف هتكون كام ؟
المسافة بين الكانات في منطقة التكثيف دي هنسميها So و هنختار القيمة الأصغر من الأربع قيم دول :
أ- 8 * قطر السيخ الرأسي (يعني كمثال : 8*16 = 128مم)
ب- 24 * قطر سيخ الكانة ( 24*8 = 192مم)
ج- 0.50 * عرض العمود الأصغر (0.50*300 = 150 مم)
د- 15 سم

– هنلاقي في المثال اللي ذكرناه إن القيمة الأقل هي 8 أمثال قطر السيخ الرأسي اللي هي 12.80 سم
– طيب عاوزين نعرف يعني عددهم هيكون كام في المتر هتقسم 100 سم اللي هي المتر علي 12.80 هيطلع العدد 7.8 يعني 8 في المتر يعني الكانات في منطقة التكثيف طلع عددها 8 فاي 8 في المتر

11- المسافة بين الكانات في منطقة عدم التكثيف يعني في المسافة العادية هتكون إسمها S و قيمتها هتكون الأصغر من القيمتين :
أ- 20 سم
ب- 15 * قطر السيخ الرأسي (يعني كمثال : 15*16مم = 24 سم )
– يعني القيمة الأصغر هتكون 20سم يعني العدد هيكون 5 فاي 8 في المتر و دي عدد الكانات في المسافة اللي في النص العادية بدون تكثيف

12- برضه الكود ذكر إن قطر الكانة أصلا هيكون يا إما 8 مم أو 0.25 * قطر السيخ الرأسي أيهما أكبر
يعني كمثال 0.250*16مم = 4 مم طبعا الأكبر هيكون 8 مم
و مش هتستخدم قطر 10 مم غير لما قطر السيخ الرأسي يكون أكبر من 32 مم

13- شرط كمان أخير : و هو حجم الكانات يكون أكبر من 0.25% من حجم خرسانة العمود
و ده في الغالب بيتحقق لو حافظت علي الشرط بتاع المسافات بين أفرع الكانات

ــــــــــــــــــــــــــــــــــــــــــــــــــــــــــــــــ

✅ بس كدة المقال طويل بس أتمني يكون مفيد لو حسيت إنك إستفدت إعمل شير للمقال و لو وصلت لحد هنا قولي عاوز المقال اللي جاي يكون عن إيه