بوست تنشن (برامج+شوب دروينج+حصر)

المرحلة الأولى :فهم واجهة البرنامج

في أول مرحلة هنتعرف مع بعض على أهم البرامج المستخدمة في تصميم البلاطات سابقة الإجهاد، وليه ADAPT Builder يعتبر المفضل في الشغل .هنفتح البرنامج ونتمشّى جوه الواجهة وحدة وحدة، وهنشوف مكان كل أيقونة بتعمل إيه، وهنشرح الـ Features الأساسية، وكمان هنقارن النسخة الجديدة بالنسخة القديمة ADAPT Builder 2015 علشان تبقى فاهم الفرق وتعرف تشتغل على أي إصدار.

بعدها هنتعلم إزاي نعرّف المواد… سواء كانت خرسانة أو حديد أو Strands وبعدين هنشوف إزاي نحدد الـ Supports المناسبة، وازاي تختار الكود اللي هتشتغل عليه وتضبط الـ Parameters الخاصة بتسليح القطاعات الضعيفة في الـ Punching، علشان القطاع يبقى آمن ومافيش مشاكل في النتايج.

هنتعلم كمان إزاي نرسم العناصر كلها — الأعمدة، الكمرات، البلاطات — بطريقة بسيطة من غير ما يحصل Errors، وهتعرف إزاي تحدد ارتفاع الدور اللي شغال عليه.وفي الآخر ندخل على الأحمال ونعرف إزاي نعمل Assign صح للـ Dead وLive وSuperimposed Loads وكل الأحمال الإضافية اللي محتاج تضيفها

طبعا كل دا هنشرحه بالتفصيل الممل فى المحاضرات اللى جايه بس عشان تكون مدرك وواعى معايا لكل خطوه بعملها وللتشويق بردو .

المرحلة الثانية: من المعماري لحد عمل الـ Loading Plan وتنفيذ الـ DXF

في المرحلة دي هنفتح مشروع المول اللي معانا ونقرأ الرسومات المعمارية خطوة خطوة علشان نطلع لوحة التحميل (Loading Plan) جاهزة للشغل. هورّيك إزاي تبدأ من أول ما ييجيلك الملف المعماري: تقرأ أماكن الحوائط، تعرف الفراغات، تحدد مواقع الجسور والسلالم، وتطلع حمل الحوائط بطريقة عملية تقدر بعد كده تحولها لـ Line Load أو Distributed Load حسب الحالة. هاشرحلك ليه أحيانًا بنمثل الحيطان كـ Line Load ومتى نحتاج نخليها Distributed، وحالة كل اختيار وتأثيره على تصميم السقف، خصوصًا لأننا هنمثلها بالطريقتين دي علشان معظم الـ clients بيطلبوا كدا.

هنشتغل كمان على Load Cases: هتعرف تضيف كذا حالة تحميل في ADAPT بسهولة، وتدخلهم بعد كده في Load Combinations المناسبة حسب الكود. هاحسب معاك الأحمال المختلفة زي Superimposed Dead Loads — التشطيبات، الفرش، السيراميك— وكمان الـ Live Loads حسب نوع الاستخدام، سواء كان مول، ممرات، مخازن، أو أي مساحة تانية.

بعد ما نخلص التحليل المعماري والحسابات اليدوية، هنعمل DXF جاهز للـ ADAPT. هورّيك إزاي تفرض تخانات البلاطة والدروب، تحدد أبعاد الأعمدة، وترسم كل عنصر بشكل مضبوط قبل عملية الـ Import، علشان الموديل يشتغل بدون أخطاء.

وبعدها ناخد ملف الـ DXF ونستورده في ADAPT Builder، وهنا هنرسم جميع العناصر خطوة بخطوة على البرنامج، ونتأكد من توافق الإحداثيات والمحاور، وسماكات البلاطة، وكل التفاصيل اللي هتخلي الموديل جاهز للتحليل بدون مشاكل.

المرحلة الثالثة: Definition and Assign Loads

بعد ما يبقى الموديل جاهز، هنبدأ نطبق كل الأحمال طبقًا للـ Loading Plan اللي عملناه. هاشرح لك عملية الـ Assign بالتفصيل: إزاي تاخد الـ Loading Plan وتطبقه على ال plan بعد ما عملنا الموديل ، وإزاي تتعامل مع التراكات أو المشاكل اللي ممكن تظهر أثناء التوزيع. هبص معاك على كل الحالات اللي بتحصل عادة في المشاريع، وهنشوف إزاي نصلحها بسرعة ومن غير ما نضيع وقت.

بعد كده هنروح على أهم جزء في واجهة البرنامج: Criteria. هنا هنعرف كل حاجة بالتفصيل الممل: إزاي تعرف الـ Material للـ Concrete، والـ Steel، والـ Strands، وتدخل Thermal Coefficient طبقًا للـ General Details بتاعت المشروع، بحيث كل الخصائص متوافقة مع التصميم الفعلي.

هنتكلم كمان عن الـ Allowable للـ Initial وService Stage: هتعرف تحدد القيم المسموح بها للإجهاد لكل مرحلة، طبقًا للأكواد المختلفة زي ECP وACI.

وأخيرًا، هتعرف تختار نوع الـ Support المناسب للموديل: ثابت، مخمّد، أو مفصلي، وإزاي كل نوع Support بيأثر على التحليل والنتائج، خصوصًا في توزيع الفواقد وسلوك البلاطة بعد الشد. هنقفل الجزء ده بشرح مبسّط لكن مستفيض عن تسليح الـ Punching، وإزاي تحدد ارتفاع الدور اللي عندك بطريقة صحيحة علشان كل الحسابات تطلع مظبوطة.

المرحلة الرابعة:  قراءة النتائج والتحقّق منها ورسم( Support Line & Splitter)

في المرحلة دي هنتعلم إزاي نعمل Run & Mesh للموديل بطريقة صحيحة،وهنعرف مع بعض إزاي نتأكد إن الأرقام اللي البرنامج طلعها صحيحة ومطابقة للواقع.

التحقق ده مش هيكون اعتماد على البرنامج بس، لأ… هنرجع لكل حاجة بحسابات مانوال، وخصوصًا رد فعل الأعمدة (Reactions) لأن ده من أهم المؤشرات اللي بتبين إن الموديل شغال صح. ومن باب التأكيد الكامل، هنعمل نفس الموديل على برنامج ETABS كمان، ونقارن نتائج ADAPT Builder مع نتائج ETABS علشان نبقى مطمنين 100% إن كل حاجة ماشية تمام.

وبعد ما نثبت إن كل الـ Output مضبوط، هنبص على أهم خطوة في المرحلة دي:
Support Line & Splitter

هتعرف معناهم إيه، وإمتى تستخدم كل واحد فيهم، وإزاي ترسمهم بسهولة من غير ما تضيع وقت… لأنهم أساس توزيع الكابلات والتحكّم في اتجاهات القوى جوه البلاطة، وأي غلطة فيهم ممكن تغيّر سلوك السقف بالكامل.

المرحلة الخامسة: رص الكابلات (Tendon Layout) وتحضير الموديل للتحليل

في المرحلة دي هنتعلم إزاي نرص الكابلات في البلاطات السابقة الإجهاد طبقًا للأكواد المختلفة، وهعرفك خطوة-بخطوة إزاي ترسم البروفايلات بتاعتك وتختار الـ drape الصحيح. هنبص على فين نحدد نقاط الـ High وLow وMid، وإزاي توزيع النقاط دي بيأثر على الأداء العام. كمان هنتعرّف على الـ options الجديدة اللي اتضافت في نسخ ADAPT Builder الحديثة (زي 2018) وتستفيد منها في تصميم البروفايل والرّص.

بعد ما نرسم الكابلات ونظبط بروفايلاتها يبقى الموديل جاهز للتحليل. هنعمل Analysis كامل ونشوف النتائج، ونعمل Checks على الـ Stresses في كل المراحل اللي اتكلمنا عنها قبل كده — Initial, Service, Ultimate — علشان نتاكد إن كل حاجة متوافقة وآمنة.

المرحلة السادسة: تسليح غير مسبوق الإجهاد (Non-prestressed Steel) وفحوص Ultimate & Deflection

بعد الحساب اليدوي هنبدأ نعمل Assign للشبكة على ADAPT Builder، لأن تسليح الـ Non-Prestressed هيكون مهم جدا وإحنا بنشيك على مرحلة الـ Ultimate.
كمان هنراجع قيود الـ Deflection طبقًا لمتطلبات الأكواد، وهنشوف إزاي نعمل Load Combinations الخاصة بالترخيم. هنطبّق كل الـ Checks عمليًا على الموديل، ولما نتأكد إن كل الـ Checks مظبوطة والنتائج تمام، هنعمل export الكابلات على الأوتوكاد، ونجهّز Calculation Sheet بشكل منظم واحترافي وبأعلى سرعة وكفاءة.

المرحلة السابعة: Shop Drawing وQuantity Surveying (حصر الكابلات والكمية)

عشان تفهم الشغل بشكل عملي، هنطبّق كل اللي اتعلمناه على مشروع مول كبير بمساحة تتجاوز تقريبًا 10,000 م²، وكمان مشروع تاني بأسلوب وأفكار مختلفة في الشوب دروينج.
هنشيّك على الـ Stresses ونطلع الـ Shop Drawings بكل التفاصيل—مخططات مسارات الكابلات، تفاصيل الـ Anchorage، وأطوال وكمّيات كل Tendonوغيرها.
وفي النهاية هنعمل حصر كميات مفصّل (Quantity Survey) بالقيم النهائية جاهز للتسليم أو للمقاول.