فيه ناس فاكرة إن المشروع بيمشي بجدول واحد من البداية للنهاية.. الحقيقة يا صديقي إنك بتتعامل مع 4 مراحل (4 Schedules)، وكل واحد ليه دوره “المصيري” اللي لازم تكون فاهمه كويس:
1️⃣ الـ Tender Schedule (الجدول الوردي)
ده اللي بنقدمه عشان نكسب المناقصة.
مدد حلوة، Milestones رايقة، وكل حاجة Smooth.
أول ما المشروع يرسى علينا ويتم التوقيع.. الجدول ده مكانه الطبيعي بيبقى “الدرج”!
2️⃣ الـ Baseline Schedule (الدستور)
ده “الكل في الكل” والمرجع الأساسي اللي الكل بيمضي عليه.
كل نشاط (Activity) محسوب بالملي.
المسار الحرج (Critical Path) واضح وصريح.
توزيع الموارد (Resources) والـ Float والـ Constraints.. كله متوثق.
ده المسطرة اللي بنقيس عليها نجاحنا أو فشلنا قدام الاستشاري والمالك.
3️⃣ الـ Recovery Schedule (جدول الطوارئ)
ده جدول “الحقونااااا”! بيتعمل لما المشروع يهرب مننا والتأخير يزيد عن المسموح.
ضغط شغل، إعادة ترتيب أولويات، تكثيف عمالة ومعدات.
مش دايماً الإدارة بتحبه لأنه بيعني “فلوس زيادة”، بس ساعات مفيش مفر منه عشان نلحق المركب قبل ما تغرق في غرامات التأخير.
4️⃣ الـ Revised Schedule (نقطة ومن أول السطر)
وده أخطرهم! بيتعمل لما الـ Scope يتغير، أو ظروف العقد تتبدل تماماً.
هنا ما ينفعش تقول “نكمل وخلاص”، لازم موافقات رسمية لأنك حرفياً بتعيد تسعير “وقتك ومجهودك” وبتثبت حقك في الـ Variation Orders.
⚠️ أكبر غلطة يقع فيها المهندس؟
إنه يتعامل مع الـ 4 جداول كأنهم حاجة واحدة. عدم فهمك للفرق بينهم معناه ضياع حقوق شركتك.. وضياع مجهودك في الاتجاه الغلط.
